De only way to describe WE COUNTRY is..
it NICE! De ole people always teach us dat yuh must nevah
overrate yusself because "pride does go before yuh fall"
and all ah dat.. But putting all jokes aside, ah tink de Maker
take time wen he was creating Triniland. We country ent BIG...
but we have everyting, at least ah lil bit of everyting and
sometings we have, yuh cyar fine no where else! For
example we have beaches...all kind! Is sand yuh want?
What color? Yuh like waves? How tall? Yuh like it calm? Ah
sure dat we have a different beach for every day in de year
and go have plenty lef' over to boot! If is sunset and sunrise
yuh like to watch, we have dat too...Plenty!!For people who
only like scenery ah tell yuh we have it all.... Landscape
of all description... Endless seascape.... Landmarks like
yuh never see before. Only ting is, ah hope yuh like de colour
green, because dis place so green yuh would tink yuh in de
Garden of Eden self! De only ting to distract yuh from de
greenery is wen de trees in bloom....
people who like history ...we have historical sites
like peas! De whole place is like a living history book. We
have some odd places too... Triniland is a mix-up kinda place...
some place real modern, like Port of Spain and SanFernando....
but not too far off yuh will find yusself rite back in de
19th century, jostling wid cow and donkey! A ting we have
plenty of is churches... all kind! Catholic, Protestant, Hindu
and Islamic. We have good educational centers too... even
ah open air one! Yuh cyar talk about Triniland and leave
out de people.... is here we real mix-up! WE have all kinda
mix breed people here because people from all over does come
and take a tayse of de Garden... and plant dey seed to boot!
As yuh will realise wen dey come dey ent coming empty hand...dey
bring dey music too... influencing we own music call
Calypso and Soca! Normally, we well behaved but come Carnival..
we does get on real bad! And dat ent all dey influence...
we FOOD too!... but dat is anodder story!